海途日誌

月,月﹗無休無歇,夜東生,曉西滅。少見團圓,多逢破缺。偏宜午夜時,最稱三秋節。 幽光解敵嚴霜,皓色能欺瑞雪。穿窗深夜忽清風,曾遣離人多慘切。

Tuesday, October 25, 2005

守株待兔的兩個喝酒農夫。


阿梁借我的盲人鏡


昨夜,夢中我我買了兩束玖瑰花送俾女人,可惜上到船卻找不到女人的房間,最後只在其中一間房找到了kathy,而我就唔知點解好怕羞地將花都送了給她。

溫書進度緩慢,大概心情還未收拾好。lunch time與朱恩和狗狗在雙魚亭食,狗狗剛從泰國旅行回來,講下旅行趣事。飯後,狗狗出左元朗交管理費,朱恩則上左我屋企hea。4點鐘,朱恩的舊同事落到上水同佢食tea,由於是一個女仔既關係,所以我都跟埋出去,都ok丫,個女仔俾人感覺唔差,不過我不嬲都唔識同年青女性溝通,所以氣氛只是麻麻地。

6點幾同媽媽大人買菜,返屋企食飯。

晚上,獨個兒係7-11飲啤酒,突然錫安教的傳教士出現,跟我傳福音差不多一個小時,神這件事的確好值得去思考,可惜我還未有信念去堅守一樣野。朱恩10點半落到黎,繼續我倆的守株待兔式飲啤酒活動,今晚收獲十分豐富,兔仔包括有szeling、szeling's男人賢仔、伍建、阿肥、鄭展、鄧國誠、阿梁,最後阿梁仲叫左connie落黎飲糖水,開心到震。之不過散左之後,個人sad得好快,原全係無晒心情,好灰,不鬧情緒的我開始鬧情緒,大事不妙。

Monday, October 24, 2005

獨處,女人,緊張。

早上,女人打黎叫我出大埔打壁球,當然好啦,一口答應。後來,女人媽媽call女人早d返屋企煲湯,於是壁球無時間打,改為跑步,對我來說,都是一樣,反正可以見下女人就心滿意足。出門口的時候都無咩特別感覺,但一到左大埔墟,女人又未到之前,個心就開始跳,雖然唔係噗噗亂跳,不過我知道自己好緊張。

女人束左馬尾,紫+紅色運動背心,紫色跑褲,白色跑鞋,幾好睇。我倆在海濱公園跑左一個多小時,相處時間唔多,講野亦唔多,但係今次係我地認識三年幾黎第一次單獨見面,要好好珍惜。

由於今日係星期一,圖書館無開,好自然俾左個藉口自己無溫書,下午睇左<<寄生獸>>第五期,然後就訓到食飯,咁又一day。

晚上同朱恩啤一啤,再上佢屋企睇電視劇<<佛山贊師傅>>,始終唔鍾意睇電視,所以不自覺訓左,我都好佩服自己一日可以訓咁多。

Sunday, October 23, 2005

退休,day one。

做左19日地盤,終於都可以暫時退休,準備考試。懶洋洋、軟綿綿的訓到十一點幾,才起身同家人飲茶,好寫意。午後到元朗出糧,$7600,開心到爆炸。一個人係元朗,於是去左睇戲,<<再說一次我愛您>>,典型劉德華電影,不過真係好耐無一個人睇戲喇,感覺幾好。

五點,教主殺左入元朗,原來佢今日休息,仲出左旺角買mp3,我倆join埋一齊之後,去左買電單車用品,再去飲涼茶。

返屋企飲湯,不過無食飯,因為趕出去中環跟Lo+和阿珊上山頂睇夜景。香港夜晚真係好靚,不過黎香港觀光的日本女仔仲靚,睇完人都精神d。今晚又了左自己一件心事,可以係山頂睇夜景,我恨左好耐架喇﹗

返粉嶺,又係同朱恩的beer time,今晚仲多左阿cae和珊姐。見到姍姐的表現,我又開始覺得係唔係所有女仔都係咁煩既呢﹖﹗唉,唔好理,唔關我事,繼續啤啤佢,姍姐走開左,阿cae買左盒雪茄煙,good~~~人生第一次食,感覺好熟悉,好似係fortune大伙教我食第一支煙既煙絲味,朱古力味,不過食落都係紅萬勁d,果然係男人煙。

多謝kathy的鼓勵,不過我都係唔得左,今日約女人上山,失敗。無相干,我預左。

Wednesday, October 19, 2005

麻醉。

酒精、尼古丁,加上工作,就是最好的麻醉藥,是忘記憂傷,忘記女人的有效方法。

Tuesday, October 18, 2005

wonderful world。




朱恩+啤酒+音樂(在7-11門外獻唱的朋友 -- 阿濤) = wonderful world

Wednesday, October 12, 2005

想你想到夢裡頭。

晚上夢見女人,lunch time夢見女人,好掛住女人。

今日文哥成個下午心不在焉,因為佢太太成個下午都下落不明,電話無人接,佢緊張到做野都做唔到,又唔可以收工,好慘。一到六點,老闆請食飯佢都唔去,即刻飛返屋企睇老婆。雖然文哥一介武夫,成日用粗口叫佢老婆,又表現得唔係好愛佢老婆,實情佢係好關心自己老婆既,從呢一件事上面,我領會到愛的另一個層次。愛的確係表現重於言語,一個行動已經足以證明你愛對方多少,根本唔需要講出口。

Tuesday, October 11, 2005

後悔,收線。

全日上鐵、扎鐵,好快又過左一日。食lunch時不經已訓左,真係好舒服。

Lo+話好耐無活動,收工於是約左老J出黎元朗食飯,起初都唔知食咩好,最後去左食日本野,馬馬虎虎啦,最重要大家一齊開心ma。老J好似心事重重,唔多出聲,聽佢講都係經濟問題,大家都為左行船死等。食野途中,女人打黎,佢話今日參觀左一隻50000噸既遊輪,真係好正,返工都唔駛點做,最多做下文件又一日,仲成日有假放,呢d工都唔知去邊度搵,不過女人又唔鍾意做文件,咁都無計,佢都係無時停果種人黎架喇。

同女人講左廿幾分鐘,諗住唔好冷落jason,咁我主動要求收線啦,點知女人嬲左我,仲即刻打俾我身邊既Lo+繼續傾,早知係咁我就唔出聲繼續講啦,激死我。

Monday, October 10, 2005

276P,谷氣﹗

同忠哥、袁哥拍檔拆屋,非常順利,成個天台鐵架拆晒,鐵閘又cut晒,家俱清埋,明天可以用大機整座三層拆掉。忠哥主動同我傾偈,好開心,因為起初我覺得佢唔鍾意我,覺得我唔做得野,今日佢肯同我講野,我覺得係一種認同,有好大滿足感。忠哥叫我唔好食咁多煙,唔好結婚住,儲錢最緊要喎年青人~~~佢都講得好有道理,可惜唔開心就好自然要煙食,結婚我又好想結,睇黎都唔可以跟忠哥既說話做了。

收左工,女人打黎,都傾左好耐,講下佢落機房既事,佢地個compressor lubricator壞左,女人幫手整,聽佢講起我都想返落船。今晚我有d反常,為左搭車返屋企既事,竟然對住女人講左好多粗口,可能真係實在好谷氣啦,香港女仔真係好唔掂,腌尖聲悶,如果佢唔係女人我一定打佢。最後我都send返個sms俾女人同佢say sorry,希望唔好影響我係佢心目中既形象啦。

Sunday, October 09, 2005

鳳一,BBQ。

自行放假一天,因為約左鳳一的舊同學bbq。雖然放假,一早就出門口同肥仔佢地飲早茶,眼訓到極,食完野,返屋企再訓。回家途中撞到中六時既師妹--綿羊的朋友,我鼓起左勇氣,終於知道佢叫connie,我覺得佢都幾靚女。

訓到下午三點幾先起身,再跟媽媽大人食tea,好悠。之後會合大家姐同阿頭坐車去"紅火蟻"燒野食,氣氛幾好丫,不過就非常累,可能係工作太辛苦喇。十點幾散人,唔知幾時我地才會再咁齊人出黎玩呢﹗﹖

好羨慕大家姐,佢同阿倫不經不覺都結左婚兩年,恆仔也差不多兩歲,一個溫馨小家庭,雖然經濟環境可能唔係咁好,但係已經好唔錯,最重要係佢地兩個人感情很好。

女人打左俾我傾左兩句,我真係唔識講電話,找不到話題,無用到爆炸。

Saturday, October 08, 2005

sad。

同袁哥兩個人係馬田繼續拆屋,佢人真係好好,做野好悠,而且所有危險野都唔俾我做,不過我就唔係好開心,因為我知道係佢仲未相信我有能力做得黎,之但係我又真係好鬼無用,重野做唔黎,用腦既又做唔黎,都好難怪佢地會咁樣諗,unhappy﹗成日我地拆左成個屋頂鐵皮,個架都拆左一部份,而d傢俱就清晒,都算係咁啦。最可惜係我唔夠力搬埋果幾隻實心門,仲整親隻腳,可惡。

連日來的工作,身體好疲倦,但Lo+做左咁多年一句都無講過,我越黎越佩服佢,佢呢個人真係好穩重,好男人,阿珊搵到個咁好既男朋友,真的幸福。

返屋企食晚飯,家中兩位心肝寶貝又為錢嘈,令我更無心機,食到要掉低個碗,一個人放工返屋企為左咩,就係想開開心心食餐飯,咁都做唔到,燥晒﹗同文峰出左上水食日本野,傾下偈,又係兩個心靈虛既悶人,大家都煩眉不展。

今晚上條船的大副--阿蕭打電話俾我,佢現在係香港出面水域拋緊錨,雙方交換一下近況,同問下我考三車牌的成績,我覺得自己個心越黎越唔係香港。

我相信我係韓國寄俾女人的postcard佢一定已經收到,原因係在澳洲的kathy都收左幾日,但佢一句都無提起過亦無打電話俾我,因為postcard我只寫了"我思念您"幾個韓國字,係我問韓國導遊教我的,佢應該唔會知我寫左d乜,然而一句都唔問起,我估計女人是迴避,而且在猜測緊我既意圖。意圖好簡單就係好掛住佢,不過我唔會講我鍾意佢之類既說話,做人一定要知道自己位置,超越了,並唔係我做人既原則。

Friday, October 07, 2005

苦戰,地盤之試煉。

由於keyboard瓜左,幾日無打日記,幸好朱恩今日幫我買左一個,十萬個感謝。

多謝Lo+介紹左份工俾我。不經已返左地盤5日了,慢慢開始適應,第一日真係好辛苦,都有諗過放棄,但係又唔甘心,無理由俾阿爸阿媽睇死架ma,死都要頂住。地盤d師傅個個都好好人,又肯教我野,做呢行都幾有趣,大家都係粗人,講野夠豪爽,我鍾意。5日做既野包括剷泥、上鐵、扎鐵、拆屋,執頭執尾,可能體力勞動多左,個人都黑實左,係未去下水船之前,我打算繼續做落去,雖然人工唔係多,$400一日,不過都唔差丫,起碼無咁悶,又可以搵下錢。

今晚過左狗良屋企打邊爐,wendy話介紹女仔我識喎,可惜丫,個個女仔唔係嫁左人,就係有男朋友,不過我又真係無咩意思咁樣識女仔喎,因為我已經鍾意左女人。